អ្នកណាជាអ្នកពិនិត្យទៅលើការផ្តល់ជំនួយ?

លេខាធិការដ្ឋាន NSAC ជាអ្នកទទួលពាក្យសុំជំនួយ ដើម្បី​ធានា​ថាពាក្យ​សុំមាន​លក្ខណៈគ្រប់ជ្រុងជ្រោយ និង​មាន​សិទ្ធិ​ប្រកួតប្រជែង ដោយ​អនុ​លោម​តាម​លកុ្ខខ័ណ្ឌ​ផ្តល់​ជំនួយ ដែល​មាន​ចែង​ក្នុងឯកសារ​ណែនាំរបស់គំរោង។ បន្ទាប់មក ពាក្យនឹងត្រូវដាក់​ជូនគណកម្មការ​ផ្តល់​ជំនួយ​ឯករាជ្យ​របស់​គំរោង ដើម្បី​ពិនិត្យ។ គណកម្មការ​ផ្តល់ជំនួយ គឺ​មានសមាជិកមក​ពីតំណាង​សង្គមស៊ីវិល និង​រដ្ឋាភិបាល ដែល​បាន​ជ្រើសរើស​ដោយ​គណកម្មការ​ឯករាជ្រ​មួយ។

មាន​តែគណកម្មការផ្តល់ជំនួយតែប៉ុណ្ណោះដែលមានសិទ្ធិសំរេច​បេក្ខជន​ចុងក្រោយ​សំរាប់​ទទួលជំនួយ ដោយ​ផ្អែកលើ លក្ខខ័ណ្ឌ​ដាក់ពិន្ទុ​ដូចខាងក្រោម ៖

• បទពិសោធន៍ដែលបង្ហាញអំពីការអនុវត្តគំរោងអភិបាលកិច្ច
• វិភាគយ៉ាងច្បាស់លាស់អំពីបរិបទមូលដ្ឋាន រួមទាំងសេចក្តីថ្លែងអំពីបញ្ហា និងកត្តាផ្សេងៗទៀតដែលទាក់ទងនឹងគំរោងគណេនេយ្យភាពសង្គមដែលដាក់ស្នើមក ។
• យុទ្ធសាស្ត្រអនុវត្តច្បាស់លាស់ និងត្រឹមត្រូវ
• លទ្ធផលដែលមានការបកស្រាយច្បាស់លាស់
• ផែនការច្បាស់លាស់សំរាប់ធ្វើការពិភាក្សា និងការសហការជាមួយអ្នកពាក់ព័ន្ធដែលជាស្ថាប័នរដ្ឋ និងស្ថាប័នមិនមែនរដ្ឋ ។
• មានទំនាក់ទំនងជាមួយអង្គការថ្នាក់មូលដ្ឋាន និង
• ឯកសារយោងពីអង្គការដៃគូ ឬម្ចាស់ជំនួយ

បន្ទាប់ពីការពិនិត្យរបស់គណកម្មការផ្តល់ជំនួយ អង្គការមូលនិធិអាស៊ីធ្វើការ​វាយ​តម្លៃលើការគ្រប់គ្រងទូទៅ និង ការគ្រប់គ្រងថវិការបស់អង្គការ ដើម្បី​ធានា​ថា បេក្ខជនមានប្រព័ន្ធគ្រប់គ្រងត្រឹមត្រូវសំរាប់អនុវត្តគំរោងដែល បានទទួលការផ្តល់ជំនួយ។

តើគណៈកម្មការផ្តល់ជំនួយត្រូវបានជ្រើសរើសដោយរបៀបណា?

បេក្ខជននៃគណៈកម្មការផ្តល់ជំនួយត្រូវបានជ្រើសរើសដោយគណៈកម្មការស្រាវជ្រាវមួយដែលមានតំណាងមកពីរាជរដ្ឋាភិបាលកម្ពុជា ធនាគារ​​ពិភព​លោក មូល​និធិអាស៊ី និង​សង្គម ស៊ីវិល ផេ្សងទៀត ដែល តំណាងដោយអង្គការNGO Forum។ បេក្ខជន​ជាប់​ឈ្មោះ​គឺ​ត្រូវ​អនុម័ត​ដោយ​ឯកឧត្តម ឧបនាយក​រដ្ឋមន្រ្តី សរ ខេង។ មុន​នឹង​ចូល​ជា​គណៈកម្មការ សមាជិកគណៈ កម្មការ​ផ្តល់ ជំនួយ​​ទាំងអស់​​ចាំបាច់​​ត្រូវចុះ​ហត្ថលេខា​លើ​ ក្រមសីលធម៌ ដើម្បី​ប្រកាន់​ខ្ជាប់​នូវ​គោល​ការណ៍វិជ្ជាជីវៈ ដូច​ជា​មិន​គិត​ប្រយោជន៍​ផ្ទាល់ខ្លួន មាន​ភាព​សុចរិត វត្ថុ​វិស័យភាព មាន​គណនេយ្យភាព រក្សា​ការសំងាត់ ភាព​បើក​ចំហ ភាពស្មោះត្រង់ និងភាពជាអ្នកដឹកនាំ ។

ដើម្បីធានាអោយដំណើរការជ្រើសរើសគំរោងសំរាប់ផ្តល់ជំនួយកាន់តែមានភាពសុចរិតថែមទៀតនោះ គឺ​មាន​គោល​នយោបាយ​មួយទៀត ដែល​​ណែ​នាំ​សមាជិក​​គណកម្មការ​អំពី​បញ្ហា​ដែល​ពាក់ព័ន្ធ​នឹង​ទំនាស់​ផលប្រយោជន៍​ជាក់ ស្តែង ឬ​ទំនាស់ផល​ប្រយោជន៍​ដែល​បាន​ដឹង​ជាមុន។ គោលការណ៍​ទាំង​នេះ​​ផ្តល់​នូវ​សេចក្តី​ណែនាំ​​យ៉ាង​​ច្បាស់​លាស់​​​ដល់​​សមាជិកគណៈកម្មការ​ផ្តល់ជំនួយ អំពី​​រ​បៀប​​ដក​ខ្លួនចេញ​ពី​ដំណើរ​​ការ​​ធ្វើការ សំរេច​​ចិត្ត​នៅ​​ក្នុង​ករណី​ដែលមាន​ទំនាស់​ផល​ប្រយោជន៍ ដើម្បី​ការពារ​តួនាទីត្រឹម​ត្រូវរបស់គណៈកម្មការ​​ផ្តល់​ជំនួយ​ដែល​ជា​អង្គភាព​សំរេច​ចិត្ត​មួយ​ដែល​មាន​លក្ខណៈឯករាជ្យ ។